PAGLULUNSAD NG BAGONG UNIFIED MULTI-PURPOSE ID CARD (UMID) NG SSS

Inilunsad ng SSS ang Unified Multi-Purpose Id Card (UMID) upang makatipid ang pamahalaan sa gastusin sa pagpapagawa ng ID dahil imbes na ang SSS, GSIS, Philhealth at Pag-ibig ay magpapagawa ng kanya-kanyang pagkakakilanlan at patunay na kasapi ay iisang ID na lamang umano ang ilalabas ng apat (4) na GOCC.

Ayon kay Emilio S. De Quiros, Jr. Pangulo at CEO ng SSS, ang Card Registration Number (CRN) ay magsisilbing habambuhay nang numero ng isang kasapi. Dagdag pa nya na ang National Statistics Office ang magsisilbing taga-berepika kung ang isang miyembro may nakarehistro nang ID card kung kaya maiiwasan ang pagdoble ng naipagkaloob ng ID.

Nakalagay umano sa nasabing UMID card ang buong pangalan, araw at lugar ng kapanganakan, pangalan ng magulang, timbang at taas. Inaasahan din na sa loob ng limang (5) taon ay 25 milyong miyembro na ang magkakaroon ng nasabing ID card. Makakakuha rin nito sa alinmang nabanggit na apat (4) na GOCC.

Ang uunahing mabigyan nito ay ang mga bagong miyembro ng SSS, GSIS, Philhealth at Pagibig kabilang na rin dito ang 607,000 na hindi pa nakatatanggap ng SSS ID subalit nakapagsagawa na ng Biometrics sa kanilang tanggapan at nakapagsumite na ng kaukulang kinakailangang dokumento. Samantala, ang mga dati nang may SSS ID ay maari ring pumunta sa anumang malapit na upisina ng SSS upang magkaroon ng bagong UMID ngunit pinapayuhan na makalipas na ang isa’t kalahating buwan na inaasahang matatapos ang ‘backlog’ nila sa ID. Cathy Cruz, PSciJourn Mega Manila